|
|
Post by Admin on Sept 30, 2020 17:26:10 GMT
Superkup Njemačke - jedan meč
srijeda, 30. septembar
Bajern – Borusija Dortmund 3:2 (2:1) Izvještaj
Toliso 18, Miler 32, Kimih 82 – Brant 39, Haland 55
|
|
|
|
Post by Admin on Sept 30, 2020 17:29:28 GMT
Borba za trofej kad joj vrijeme nije...
Njemački Superkup dolazi u čudno i nezgodno vrijeme za Bajern i Dortmund. Utakmica koja po tradiciji njemačkog fudbala otvara sezonu pomjerena je zbog krize izazvane pandemijom korona-virusa i pada nekoliko dana uoči reprezentativne pauze, a poslije vikenda u kom su dva najbolja tima Bundeslige doživjela vrlo neprijatne poraze.
I dok smo Dortmundovo saplitanje protiv „malih“ navikli (poražen u Augzburgu sa 0:2), porazi Bajerna poput onog nedjeljnog u Sinshajmu (1:4) spadaju u najveća iznenađenja sezone.
Bajern je odigrao ubjedljivo najslabiji meč otkako je Hansi Flik sjeo na klupu, prekinut je niz od 32 meča bez poraza, pa Bavarci ne ulaze baš kao apsolutni favoriti protiv Milionera. Mada treba imati na umu da je Flik dosta kombinovao. Prvi put u svom mandatu na kupi je ostavio Roberta Levandovskog, odmorio Leona Gorecku, zamjenio pola odbrane. Hofenhajm je to maksimalno iskoristio i nanio najteži poraz klubu iz Minhena još od onog debakla u Frankfurtu (1:5) pod Nikom Kovačem.
Kada je Bajern u pitanju rotacije su moguće i u Superkupu. Prije svega jer se Kingsli Koman ponovo konkuriše za tim. Junak finala iz Lisabona mogao po prvi put u novoj sezoni da bude starter...
Borusija je prošle sezone tukla Bavarce u Superkupu sa 2:0. Taj tim bio je slabiji od današnjeg. Po toj logici šanse za novo iznenađenje još su veće, međutim Milioneri su pokazali u Augzburgu da u njihovoj igri ima mnogo manjkavosti. Bez obzira na skoro 700 pasova više od domaćina (da, dobro ste pročitali, 700 pasova više i posjed od preko 70 odsto) oštrica napada kao da je otupila. Erling Haland i Džejdon Sančo jedva da su nekoliko puta priprijetili golmanu Augzburga.
Bajern je dobio tri od četiri posljednja Klasikera. Dao je deset golova. Borusija je slavila samo u prošlogodišnjem Superkupu. Zanimljivo da nijednom na tim susretima nije došlo GG, a mnogi po inerciji očekuju goleadu s oba strane kada se sastaju Bajern i Borusija.
Možda je baš ovaj Superkup šanse da se nešto u tom smislu promjeni i vrati „korjenima“?
Od odlaska Jirgena Klopa Milioneri su u Minhenu dobili samo jednom. Jasno je ko dan da je Bajern i sada favorit. Ali ne tako veliki kao prije poraza od Hofenhajma.
Mozzart Sport
|
|
|
|
Post by Admin on Sept 30, 2020 20:37:40 GMT
Bajern uzeo SVE!
.jpg)
Malo sada već tradicionalnog dortmundskog mazohizma. Više suvog kvaliteta Bajerna. Sasvim dovoljno za Bajernovih 3:2 u borbi za njemački Superkup i peti trofej Bavaraca u ovoj potpuno poremećenoj sezoni. Jedino što se nikada ne mijenja jeste ta Bajernova glad za trofejima, ove sezone oslikana u peharima Bundeslige, Kupa Njemačke, Lige šampiona, evropskog, a sada i domaćeg Superkupa.
Uz istina subjektivan utisak da će odlazak Tijaga Alkantara ipak biti teško nadoknadiv, a još više onaj o tome da Bajern nije večeras djelovao toliko superiorno kao u završnici Lige šampiona. Sve je to ipak zasjenila ta samoubilačka crta u karakteru Borusije, jer odluka Lusijana Favra da u trenucima kada je gost iz Dortmunda bio u naponu izvede iz igre raspoloženog Erlinga Halanda zaista zahtjeva obeštećenje, dok o potezu Tomasa Dilejnija koji je za poslijedicu imao pobjednički gol Jozue Kimiha ne vrijedi ni trošiti riječi: kiks kakav ozbiljnim igračima ne smije da se dešava.
Treneri obje ekipe su poprilično mijenjali sastave u odnosu na posljednje prvenstvene mečeve u kojima su pretrpili teške poraze. Pa je tako Bajern poslije 1:4 protiv Hofenhajma igrao bez Džeroma Boatenga, Davida Alabe, Serža Gnabrija, Džošue Zirkzija i povrijeđenog Leroja Sanea u startnih 11. Umjesto njih od prvog minuta na terenu Niklas Zule, Havi Martinez, Lukas Ernandez, Kingsli Koman i Robert Levandovski. Leon Gorecka je takođe bio van konkurencije zbog povrede.
Na drugoj strani, u Minhen nisu ni putovali bolesni Džejdon Sančo i Roman Burki, dok su kao kaznu za poraz od Augzburga na klupi počeli Aksel Vitsel, Rafael Gerero Džud Belingem i Đovani Rejna. Njihova mjesta zauzeli su kapiten Marko Rojs, pa Marvin Hic, Mahmud Daud, Tomas Dilejni, Feliks Paslak i Julijan Brant.
I ne može da se kaže da su podbacili, mada je početak utakmice nagovještavao lagan posao za Bajern. Korentan Toliso poslije brze kontre i asistencije Roberta Levandovskog, pa Tomas Miler na centaršut Alfonsa Dejvisa donijeli su Bavarcima ubjedljivo vođstvo poslije samo 32 minuta igre.
U uobičajenim okolnostima tu bi bio i kraj meča. Međutim, kao da je Hansi Flik tempirao formu za onu brutalnu završnicu u Ligi šampiona što bi doduše bilo sasvim razumljivo. Činjenica je ipak da ovaj sada Bajern ne igra onaj supersoničan fudbal koji je Barselonu lomio kao groznica. Bajern je, kao rijetko kad, propustio priliku da se potvrdi kao najnemilosrdniji tim Evrope, uvijek rad da “ubije“ rivala čim ovaj zažmuri na jedno oko.
Umjesto toga, splasnuo je tempo i Borusija je dobila šansu da udahne i uspravi se. A kad se Erling Haland uspravi slika se potpuno promjeni. Benžamen Pavar je poslao loš pas i Borusija je u tri poteza matirala Manuela Nojera pogotkom Julijana Branta. Haland je u tom 39. minutu bio asistent, da bi u 55. na pas Tomasa Dilejnija i sam gurnuo loptu u mrežu i podsjetio nas koliko je nenormalno brz i okretan za džina od 194 centimetara.
I baš kad je zaličilo da se Haland riješio da maltretira Bajernovu odbranu, pomalo neshvatljiva odluka Lusijana Favra da ga izvede iz igre i na teren pošalje Rejnijera čije smo ime tada prvi i jedini put i vidjeli na ekranu. Nismo razumjeli logiku, jer Haland nije izgledao povrijeđen, a mada Superkup nije najvažniji pehar na svijetu nije baš ni toliko nebitan da najopasnijeg igrača izvodiš iz igre da bi ga odmarao za prvenstveni sudar sa – Frajburom?!
Kako bilo, kad je Haland izašao, Borusija je u očima rivala prestala da izgleda tako zastrašujuće i brzo je težište igre prebačeno sasvim ispred kaznenog prostora gostiju. A kad ti se Bajern ulogori ispred šesnaesterca zna se šta te čeka.
Jedna greška je bila dovoljna, Dilejni je bio neoprezan na sredini terena, Jozua Kimih mu je oduzeo loptu, odigrao dupli pas sa uvijek spremnim Levandovskim, prvi udarac mu je odbranio Hic, ali se spretno on snašao i u padu, kad mu je već lice bilo ispred lopte, bocnuo loptu za konačnih 3:2.
Sve je bilo poremećeno u ovoj 2020. godini. Sve osim Bajerna.
Superkup Njemačke - jedan meč
srijeda, 30. septembar
Bajern – Borusija Dortmund 3:2 (2:1)
Toliso 18, Miler 32, Kimih 82 – Brant 39, Haland 55
Mozzart Sport
|
|
